Our whanau
Kaitiaki Whenua
Whatungarongaro te tangata, toitū te whenua People come and go, but the land endures.
Ko te ngahere ko au, ko au, ko te ngahere
I am one with the forest.
Mohoa nei ki Aotearoa nei he nui ngā poraka whenua Māori kāore e whakamahia ana, me te aha, kāore e puta he hua ki ngā kaitiaki whenua, ki te hapori, ki te motu whānui, otirā ki a Papatūānuku anō hoki. Ko tōna 1.5 miriona heketea whenua o Aotearoa kei roto i ngā ringaringa o te Māori, ā, ko tōna 79% he whenua “tāmata”, he kino ake rānei, ka mutu, neke atu i te 50% o aua whenua e kākahuria ana e te ururua. Ko te nuinga o aua whenua kāore i te whaihua mā ngā kaitiaki whenua, kāore hoki e whaihua mā te motu whānui, pēnei i te pupuri waro, te whakakounga i te oneone me te wai, te whai mahi, me te whai hua ā-ohanga.
He hononga ā-wairua tō tātou, tō te iwi Māori ki ō tātou whenua, ki ō tātou ngahere, otirā ki a ngāi tipu me ngāi kīrehe ka whai oranga i tēnā ngahere i tēnā ngahere. Ka whirinaki tātou ki ō tātou ngahere kia ora ai tātou, mai i te hāora tae atu ki ngā whakamahinga rākau huhua o ia rā, o ia rā. Hāunga anō ērā painga o te whakatipu rākau, he whakaruruhau anō hoki ngā ngahere, arā, ka kaupare atu i te horonga whenua me te whakamauru i te āhuarangi hurihuri.
Ka mārama tātou te iwi Māori ki te hononga i waenganui i a tātou me ā tātou kōwhiringa whakamahinga whenua. Ehara i te mea ko te oranga ā-ohanga anake tā tātou e whai nei, engari ka whai whakaaro hoki tātou ki ngā putanga ā-hapori, pēnei i te whai mahi, te whai oranga mō ngā uri whakatipu, te tiaki i tō tātou taiao me ō tātou wai, koirā hei whāinga pae tawhiti. Haere ngātahi ai ēnei āhuatanga me tō tātou hononga ki te whenua me ngā hua o Tāne.
Inā te pito mata o ngā ngahere hei puna oranga ōhanga, oranga hapori ā mohoa nei, āpōpō hoki. Ko te ngahere hauhake arumoni tētahi o ngā puna whai moni mō runga i ngā whenua kāore e pai mō ētahi atu whakamahinga, ā, mā Te Pūnaha Tauhokohoko Whiwhinga Waro e whai moni ai nā runga i te āheinga pupuri waro o te rākau. Waihoki, mā te whakatipu ngahere e hua mai ai he mahi mau roa, pērā i ngā pūkenga whakawhitiwhiti me ngā whai wāhitanga pakihi i te rāngai ngahere, mai i te ngaki i te whenua, te mahi whakahaere whenua tae atu ki te mahi mana urungi.
E te iwi, he whai wāhitanga nui tō tātou kia whakamahia ō tātou whenua e hua mai ai he oranga mō ngā uri whakatipu, ka mutu, e hua mai ai he painga mō te iwi Māori.
Mehemea kāore e mahia ināianei, āhea? Mehemea ehara ko tātou, ko wai?
Hillel the Elder
a. ki te wāhi e tū ai ō mātou whenua
b. ki te āhua o ō mātou whenua
c. mehemea kua whai mana urungi
d. ki te take me whai mana urungi, ā, mā wai mātou e āwhina
Hāunga anō te wā me te ngao ka whakapauhia, ko te takahi i te ara tūhura whenua Māori he mahi e hiamo ai te ngākau, e whai hua ai hoki. Maringanui ana he maha ngā rauemi utu-kore e kitea ai ngā mōhiohio mō tēnā mō tēnā poraka whenua, pērā i te wāhi e tū ai te whenua; ngā raraunga mō te āhua o te whenua; te whai māramatanga mō te mana urungi, te take me whai mana urungi, ā, me pēhea te whakarite mana urungi.
Kei hea ō mātou whenua me ētahi anō mōhiohio whaihua?
Ko tētahi rauemi utu-kore pai ki te whai mōhiohio e hāngai pū ana ki ngā whenua Māori ko te paetukutuku Whenua Viz ka whakahaerehia e Te Puni Kōkiri me Manaaki Whenua. Tuia ki ngā mōhiohio mō te Karangatanga Whakamahinga Whenua (tirohia te Ripanga), ka kitea hoki ngā mōhiohio mō te momo kapinga whenua, te āhuarangi, me te tātaritanga oneone. Ka kitea hoki i te paetukutuku o Māori Land Online (tirohia te wāhanga kua miramirahia i te kapomata kei te taha nei) he hononga tōtika ki ngā mōhiohio mō te poraka whenua kei a koe.
Ko tētahi anō rauemi pai ko te paetukutuku Tupu.nz ka whakahaerehia e Te Puni Kōkiri, ki reira kitea ai te whenua mā te whakauru i te ingoa o te whenua, te ingoa rānei o te tarahiti, te nama rānei o te poraka whenua. Ahakoa he āhua whānui ngā mōhiohio kei Whenua Viz me Tupu.nz, ko te painga o aua rauemi he whakakotahi i ngā puna mōhiohio huhua ki te wāhi kotahi hei pūtahitanga, ā, mā aua mōhiohio e āwhina ki te whakatau he aha te ara tika hei whai mō te whenua.
Mā Whenua Oho e āwhina mā te tātari i ngā raraunga mō te whenua me te āwhina, kaua noa iho mō te mahi whakatipu ngahere anake, engari hoki mō ētahi atu whakamahinga whenua.
Tautohua taku Whenua kei Tupu.nz
He aha te take me whai Mana Urungi?
Ko tētahi anō pātai nui mō tēnei ara tūhura ko te mana urungi, arā, kua whai mana urungi taku whenua? Ki te kore, me aha mātou? He maha ngā poraka whenua Māori kāore anō kia whai mana urungi, e ai ki tētahi rangahau he 15%, me te aha, me whai āwhina ō tātou whānau kia whakatūria he mana urungi. Me whai mana urungi mehemea e hiahia ana tātou ki te whakatutuki i te pito mata o ō tātou whenua. Mehemea he waka ō tātou whenua, ko te mana urungi te kaihautū.
He nui ngā mōhiohio whaihua kei te paetukutuku Tupu.nz kia mārama ai ki te mana urungi me ngā tukanga mō te whakatū mana urungi. Koia ko ēnei: he aha tēnei mea te mana urungi; he aha ai me whai mana urungi; ngā momo mana urungi; he pēhea te āhua o te mana urungi pai, me pēhea hoki e whakatū mana urungi. Ki ngā rohe ka whakahaerehia e ngā tari Kāwanatanga, pērā i a Te Puni Kōkiri me Te Kooti Whenua Māori, he ratonga tautoko i ngā kaitiaki whenua Māori mō ngā take mana urungi.
Nā te hiranga o tēnei kaupapa, ko tā Whenua Oho he ārahi, he āwhina i a koutou ngā kaitiaki whenua Māori ki te whakatere i te tukanga whakarite mana urungi.
a. Karangatanga whakamahinga whenua me ngā taunakitanga whakamahinga whenua
b. Whakauruuru kōwhiringa pāmu, ngahere hoki
c. Whakatipu ngahere arumoni (hauhake)
d. Ngahere toitū
e. Ngahere taketake
f. Rongoā Māori me te Ahumāra
Inā te maha o ngā ara tūhura e wātea ana. Ka āwhina pea ngā puna mōhiohio e kōrerohia ana i konei, ā, arā hoki ētahi anō puna mōhiohio kāore e kōrerohia ana. He āwhina nui hoki pea kei roto i ngā whakamahinga poraka whenua i tō rohe e pātata ana, ināhoki, ka nui te tūponotanga he rite ngā āhuatanga oneone, āhuarangi hoki o ngā poraka whenua o te rohe e noho nā koutou. Tēnei mea te ‘korahi’ he āhuatanga me mātua whai whakaaro kia whai wāhi atu ai ki ngā mōhiohio me ngā utu, me te aha, ka tino whai hua ki te katoa mehemea ka nui ake tērā momo whakamahinga whenua ki te rohe e noho nā koutou.
Ko tā mātou e ārahi nei inā tūhurahia ai ngā kōwhiringa, kia mārama pū ki ngā wawata o te tarahiti me ngā kaitiaki whenua o te whenua. Me mōhio pū ki te ara rautaki ka takahia kia hāngai ki ngā putanga ka hiahiatia, ngā here e mōhiotia ana me ngā wā e kitea ai te ngāwaritanga. Mā Whenua Oho e āwhina mā te whakawhāiti i te arotahi me te tuku i ētahi kōwhiringa hei tūhura e ahu mai ana i ngā wawata ake o te whānau me ngā āhuatanga ake o te whenua.
Karangatanga Whakamahinga Whenua:
He ārahitanga pea kei roto i te Karangatanga Whakamahinga Whenua kei te Ripanga o raro iho nei hei kai mā te hinengaro.
| LUC#1 | Description |
|---|---|
| 1 | E tika ana mō ngā huanga kai. Koia te whenua tino urutaunga. |
| 2 | He paku noa ngā here mō ngā huanga kai. He whenua urutaunga. |
| 3 | Arā ōna here mō ngā huanga kai. |
| 4 | Inā kē te nui o ngā here mō ngā huanga kai me te mahi māra. E tika ana mō ētahi momo huanga kai whāiti, te mahi kaikai toitū, te ngahere toitū rānei. |
| 5 | Kāore e tika ana mō te huanga kai. He paku noa ngā here ki te kaikai, ngā aka wāina, ngā uru rākau, te ngahere rānei. |
| 6 | He whenua whakataka, he hiwi tuawhenua haumako, he iti, he paku nui ake rānei ngā here, ngā mōreareatanga rānei ki te mahi whakataka, ki ngā uru rākau me te ngahere hoki/rānei. |
| 7 | He kino, he tino kino rānei ngā here, ngā mōreareatanga rānei mō te mahi kaikai me ngā ritenga tiaki oneone, he pai ake mō te mahi ngahere. |
| 8 | He tino kino, he kino rawa atu ngā here, me whai uhi otaota toitū, whakaruruhau hoki, kāore e pai mō te mahi ahumāra. |
He ārahitanga noa iho tēnei. I mua tonu i te whakatinana i te mahere whakamahinga whenua, tēnā tonoa tētahi mātanga kia whakahaerehia he rangahau whakamahinga whenua. Anei hoki a Whenua Oho hei ringa āwhina i roto i tēnei mahi.
Ko tētahi rauemi utu-kore pai kia whai mōhiohio e hāngai pū ana ki ngā whenua Māori ko te paetukutuku Whenua Viz ka whakahaerehia e Te Puni Kōkiri me Manaaki Whenua. Tuia ki ngā mōhiohio mō te Karangatanga Whakamahinga Whenua (tirohia te Ripanga), ka kitea hoki ngā mōhiohio mō te momo kapinga whenua, te āhuarangi, me te tātaritanga oneone. Ka kitea hoki he hononga tōtika ki ngā mōhiohio mō te poraka whenua kei te paetukutuku o Māori Land Online
Ahakoa he āhua whānui ngā mōhiohio kei Whenua Viz me Tupu.nz, ko te painga o aua rauemi he whakakotahi i ngā puna mōhiohio huhua ki te wāhi kotahi, ā, mā aua mōhiohio e āwhina ki te whakatau he aha te ara tika hei whai mō te whenua.
Mō ētahi anō mōhiohio mō te wai me te hopunga wai, ngā hiranga o te takotoranga whenua, me ngā taipitopito oneone, torohia te paetukutuku S-MAP Online ka whakahaerehia e Manaaki Whenua. Me whakarite i tētahi pūkete (utu-kore), ā, me mātaki hoki i te “taiāwhio” kia mōhio ai he aha tā koutou e rapu nā, ā, me pēhea hoki e whakamāori kia tika ai. Ahakoa te momo whakamahinga whenua, ka tino whai hua mehemea ka whai māramatanga ki te āhuatanga o te arawai mā te hopunga wai.
Ngā Kōwhiringa Whakatipu Ngahere:
He nui ngā kōwhiringa ka ahu mai i te mahi whakatipu ngahere, tērā ia ko te nui o te whenua, te wāhi, te momo rākau me te pūtake. He āwhina nui te whai māramatanga ki ō ake wawata i mua tonu i te tūhura i ēnei kōwhiringa whakatipu ngahere. Ko te pūtake o tēnei wāhanga he hoatu kōwhiringa whānui hei tūhuratanga ā tōna wā.
Ngahere Whakauruuru
E taea ana te whakauruuru ngahere ki ētahi anō whakamahinga whenua hei painga mō te katoa, arā, ko te mahi pāmu te tino tauira. Hei tauira māori noa, ko te hurihanga o ngā arawai hei aukatinga mā ngā kararehe pāmu me te whakatipu rākau ki ngā tahataha arawai. Ko tētahi anō tauira kāore e tino kitea engari he tino angitu, ko te whakatipu ngahere toitū ki ngā wāhi whenua tītōhea o te pāmu, ki ngā wāhi hoki he nui te tūponotanga horo whenua. Hāunga anō ēnei tauira e rua, inā te huhua o ngā kōwhiringa whakamahinga rākau, tae rawa ki te whakatipu ngahere hauhake me te whakatipu momo rākau rerekē. Ko te mea nui kia mārama ki ngā whāinga o te whakatipu ngahere. Ka whāia rānei te whakatipu ngahere hei whakaheke i te tūraru ahumoni, arā, mā te ngahere arumoni e whiwhi moni ai mā te pupuri waro, te hauhake rānei? Kei te āwangawanga rānei mō te horonga whenua, te tūkinotanga rānei o te wai, ā, mā te ngahere toitū e whakaheke i te pānga o ērā take taiao me te whai moni waro hoki? Ko te whāinga rānei kia whāia tētahi kaupapa ā-hapori, arā, kia tūhonoa te hunga whai painga mā te whakarite mahi, mā te whakarite wāhi rēhia rānei i tētahi ngahere toitū taketake? E mōhio ana tātou te iwi Māori ehara i te mea kotahi anake te ara e tutuki ai ō tātou wawata, koirā te take e kōrerohia ana ngā kōwhiringa huhua, e taea ai te tīpako i te whakamahinga whenua tika mō taua whenua, te whakauru i ngā mahinga pāmu pai, te whakatō i te rākau tika ki te wāhi tika, tētahi anō whakamahinga rānei e pai ana, e tika ana mā koutou ngā kaitiaki whenua.
Mā te mōhio ki te Karangatanga Whakamahinga Whenua me te aro ki te whakamahinga whenua e whai tūāpapa ai tēnei tikanga. Mō ngā kōwhiringa whakamahinga whenua huhua, anei a Whenua Oho hei ringa ārahi i a koutou ngā kaitiaki whenua Māori me te tūhono i ngā ratonga ngaio kia mahia he rangahau whakamahinga whenua, he tauira pakihi rānei hei kaupapa tuku moni. I ētahi wā ka whai wāhi pea te whai pūtea mō ēnei kaupapa “rangahau”, ā, mā Whenua Oho e āwhina ki te whakatere i ngā tari kāwanatanga kia riro ai te pūtea tautoko.
Ngahere Arumoni
He tino pai te ngahere arumoni, te ngahere hauhake rānei mō runga i te whenua Māori. Ko te nuinga o ō tātou whenua Māori he Karangatanga Whakamahinga Whenua 6-8, nā reira he pai ērā whenua mō te whakatipu ngahere, otirā he pai ake te ngahere toitū mō runga i ngā whenua Karangatanga 8 me ngā whenua ngāhorohoro.
Ehara i te mea ka kōrerohia ngā ahuatanga katoa o te ngahere arumoni i konei, ki te hiahiatia te roanga ake o ngā taipitopito me ngā meka, ngā whika hoki o te ahumahi ngahere, tēnā, torohia te paetukutuku Te Uru Rākau. Mā te ngahere hauhake e kitea mai ai ngā painga katoa o te whakatipu ngahere, tuia ki tēnā ko ngā whiwhinga moni pupuri waro me te hauhake rākau. He whitiwhiti te āhua o te huamoni, ā, he nui ngā take ka pērā ai, heoi, anei e whai ake nei ngā tino take:
- Kua whakatauhia te mahere whakatipu ngahere – kua tīpakohia te whānau rākau, te momo rākau, te maha o ngā rākau ka whakatōngia me te pūnaha whakatipu rākau ka whakamahia.
- Te roa o te whakatipu – ka tohua mai tēnei e te momo rākau me te āhua o te mākete (te utu mō ngā rākau i te wā hauhake).
- Te tikanga hauhake – ka tohua mai tēnei e te takoto o te whenua; ko te nui o te utu ka hāngai ki te poupou o te whenua me te uaua o te oneone
- Te tawhiti ki te mākete – ka tohua mai tēnei e te tawhiti o te haere ki te wāpu kawe rākau tata rawa; ko te nui o te utu ka hāngai ki te tawhiti o te haere.
Nā runga i te whitiwhiti o ngā whiwhinga moni, kāore e tika ana kia tuku whika tōtika i te korenga o te mōhio ki te horopaki me te āhua o te whenua. Heoi, hei tohu pea i te whiwhinga moni i te taumata teitei, mō te tikanga whakatipu ngahere paina, i te wā o te hauhake (25-30 tau), ka nui ake i te $20,000 mō ia heketea. E ai ki te utu pupuri waro ā mohoa nei ($40 mō ia kōwae), ko te whiwhinga moni pupuri waro mō taua poraka whenua ngahere i roto i te 20 tau mai i te whakatūtanga o ngā rākau ka nui ake i te $10,000 mō ia heketea.
Anei a Whenua Oho hei ringa ārahi i roto i tēnei kaupapa, ā, mā te āta whakawhitiwhiti kōrero e taea ai te hoatu whakatau tata pai ake o ngā whiwhinga ka hua mai. Waihoki, anei a Whenua Oho hei ringa āwhina ki te rapu kaiwhakarato whakatipu ngahere ngaio e hāngai tika ana ki ngā tikanga Māori, ā, ka tuku tātaritanga whakamahinga whenua hōmiromiro me te whakatutuki i ngā mahi mehemea koirā te hiahia.
Ngahere Toitū, Ngahere Taketake
He tino rerekē te ngahere toitū ki te ngahere arumoni. Ko te pūtake o te ngahere toitū he tiaki, he whakarāhui whenua, ā, he rite tonu te haere ngātahi o ngā ngahere toitū me te whiwhinga moni pupuri waro. He tino pai te ngahere toitū mō runga i te whenua Māori, ināhoki, ko te nuinga he Karangatanga Whakamahinga Whenua 6-8. He āhua maha ngā wāhi e taea ai te whakatū me te hauhake ngahere arumoni, heoi, nā te ngoikore o te oneone, te ngāhorohoro o te whenua, te whakaraerae o te arawai, he pai kē atu pea te ngahere toitū ahakoa heke iho ai te whiwhinga moni.
Ehara i te mea ka kōrerohia ngā āhuatanga katoa o te ngahere arumoni i konei, ki te hiahiatia te roanga ake o ngā taipitopito me ngā mōhiohio mō ngā rākau taketake me ngā rākau tauhou, tēnā, torohia te paetukutuku.
Te Uru Rākau
Mai i te tirohanga tiaki taiao inā te nui o ngā painga ka puta ki te whenua mai i ngā ngahere toitū, ka mutu, mai i te tirohanga arumoni ka hua mai hoki ko te moni pupuri waro.
Arā anō te kōrero, nā runga i te whitiwhiti o ngā whiwhinga moni, kāore e tika ana kia tuku whika tōtika i te korenga o te mōhio ki te horopaki me te āhua o te whenua. Heoi, hei tohu pea i te whiwhinga moni i te taumata teitei, e ai ki te utu pupuri waro ā mohoa nei ($40 mō ia kōwae) mō te ngahere toitū ka piki ake i te $20,000 mō ia heketea i roto i te 50 tau.
Anei anō a Whenua Oho hei ringa ārahi i roto i tēnei mahi, ā, mā te whakawhitiwhiti kōrero e taea ai te hoatu whakatau tata pai ake o ngā whiwhinga ka hua mai. Anei hoki a Whenua Oho hei ringa āwhina ki te rapu kaiwhakarato whakatipu ngahere ngaio e hāngai tika ana ki ngā tikanga Māori, ā, ka tuku tātaritanga whakamahinga whenua hōmiromiro me te whakatutuki i ngā mahi mehemea koirā te hiahia.
Me mātua mōhio, arā hoki ngā wā e taea ai e ngā ngahere toitū, tae rawa ki ngā ngahere taketake, te hoatu i ētahi kōwhiringa hauhake arumoni. Mā Whenua Oho tēnei take e āta matapaki ina hiahiatia.
Rongoā
E tūhono ana te whai wāhitanga rongoā ki ngā ngahere taketake, ka mutu, me whai āwhina matatau. Arā ētahi kaiwhakarato e mārama pū ana ki te tuku i ēnei mōhiohio, ā, mehemea koinei tētahi whakamahinga whenua e whai whakaarohia ana, me kōrero tōtika ki ngā pūkenga ngaio e tino mārama ana ki taua whakamahinga. Anei ētahi rauemi whānui:
Ahumāra
Kāore e matapakitia ēnei whakamahinga whenua ki tō mātou paetukutuku, nā te mea he kaupapa motuhake, ā, he whānui rawa ngā taipitopito hei kōrerotanga mā mātou. Heoi anō, he ringa āwhina a Whenua Oho hei rapu kaiwhakarato ngaio e hāngai tika ana ki ngā tikanga Māori, ā, ka whakahaerehia e rātou he rangahau whakamahinga whenua hei mahi utu, mā konā e kitea ai ngā kōwhiringa ka puta i ngā āhuatanga whānui o te whenua, ngā kaupapa pakihi rānei ka puta i ngā kōwhiringa ahumāra kua tīpakohia.
a. Kāwanatanga
b. Arumoni (hauhake rānei)
c. Toitū
d. Taketake
e. Ngā tahataha awa me ngā mahi whakakounga wai
Ko tā tēnei wāhanga e whakaaro ana kua whakaritea kētia te mana urungi, kua whai mōhiotanga whakatipu ngahere, ā, e hiahia ana ki te tūhura i ngā momo āwhina e taea ana mō ēnei kōwhiringa.
Kāwanatanga
Mohoa nei karekau he tautoko ā-pūtea mai i te kāwanatanga mō te whakatū ngahere whānui. Tae rawa ki te Tīhema 2020, i reira te āheinga ki ngā tahua pūtea mō te whakatipu ngahere, ā, e manako nui ana mātou ka whakatūria anō tēnei e te kāwanatanga hou. Kia puta ēnei taipitopito, mā mātou e whakamōhio atu.
Heoi anō, arā ētahi pūtea moni mai i te kāwanatanga mō ētahi momo mahi whakatipu ngahere e hāngai ana ki te whakatō tipu ki ngā tahataha o ngā awa me te whakarauora rohe kōreporepo, arā, mā te kaupapa o Te Mana o te Wai.
Ko te pūtea moni Jobs for Nature tētahi anō ara whai moni hei tautoko i te whakakounga i tō tātou taiao mā te patu konihi, te whakarauora rohe kōreporepo me te whakaora tipu.
E tuwhera ana hoki he pūtea tautoko mai i Te Puni Kōkiri, Māori Agribusiness, me te Ministry for Business Innovation and Enterprise Ehara ēnei i ngā pūtea e hāngai tika ana ki te whakatipu ngahere engari e āhei ana te whakamahi i raro i ngā paearu whāiti hei tautoko i ngā mahi whakakounga i ngā hua o te whenua. E mārama ana a Whenua Oho ki ngā paearu whānui, te tukanga e riro ai te pūtea me ngā whakapātanga kei ēnei rōpū, me te aha, he tūnga pai tō mātou hei ringa ārahi ina hiahiatia.
Ministry for Business Innovation and Enterprise
Pūtea Tūmataiti
E mārama ana ki te take ka noho ko te pūtea hei tauārai mā ngā Kaitiaki Whenua Māori ki te whakatutuki i ō tātou wawata i runga i ō tātou whenua. Kua āta tātarihia, ā, kua tīpakohia e Whenua Oho he huihuinga kaituku moni tūmataiti e tika ana mā ngā Kaitiaki Whenua Māori, otirā, e hiahia ana ki te mahi tahi me ngā Kaitiaki Whenua Māori. Mehemea ko te tauāraitanga ki te whakatipu ngahere ko te whai moni, ākuni pea ko tētahi, ko ētahi rānei o ēnei kaituku moni he hoa kaipakihi pai. Ka pēnei te hanganga whānui – mā te kaitiaki whenua te whenua e whakarite, mā te hoa kaipakihi te pūtea e whakarite, ā, i ētahi wā māna hoki ētahi pūkenga whakahaere hei whakatinana i te mahere.
Ko tētahi wāhanga o te tukanga tātari ko te āta matapaki i te taha o ngā kaihautū o ēnei hoa kaipakihi tuku moni. He whakatūturu i te mōhiotanga, ahakoa ehara rātou i te Māori, ka mōhio tonu rātou ki ā tātou tikanga, ka mōhio hoki rātou ehara te moni i te kaupapa matua ki a tātou te iwi Māori i ngā wā katoa. Ka arotake hoki mātou i te hanganga pakihi ka hua mai i te Tūhononga Hinonga, tae rawa ki ngā tauira kirimana ka tukuna e ēnei hoa kaipakihi. Mā konā e tau ai pea te ngākau i runga i te mōhio e hāngai tika ana ngā hiahia kua kōrerohia me ngā kupu ake o te kirimana. Ahakoa tonu, ka kore tēnei e whakakore i tā mātou whakaritenga kia rapuhia e ngā taha e rua he āwhina ā-ture motuhake i mua i te urunga ki tētahi Tūhononga Hinonga. Tēnā koa, whakapā mai ki te hiahia matapaki i tēnei take.
"We, as Māori, have a spiritual connection with our lands and the forests, flora and fauna that flourish on them"
